सहमतिय सरकार गठनको समय सिमा आज सकिदै, सर्वदलिय बैठकमा अन्तिम प्रयास गरिने

माघ १९ काठमाण्डौ ।सहमतिय सरकार गठनका लागी आज पनि सर्वदलीय बैठकमा छलफल हुने भएको छ । सवैभन्दा ठुलो दलको हिसाबले सरकार बनाउने जिम्मा पाएको काङग्रेसले आज तेस्रो पटक सर्वदलिय बैठक बोलाएको हो । हिजोको बैठकमा आफ्नै नेतृत्वमा सहमतिय सरकार बनाउन लिखित सहमति मागेको थियो, तर अहिले सम्म जम्मा १३ दलले मात्रै काङग्रेसलाई लिखित समर्थन जनाएका छन् । आजको बैठकमा फेरि पनि सवैदलसंग सहमतिको लागि आग्रह गरिने प्रवक्ता दिलेन्द्र बडुले जानकारी दिनुभयो । सवैदलले काङग्रेसलाई समर्थन जनाए राष्ट्रिय सहमतिको सरकार बन्ने छ तर तेस्रो ठुलो दल एकीकृत माओवादी र राप्रपा नेपालले प्रतिपक्षमै बस्ने बताएकोले बहुमतिय सरकार बन्ने सम्भावना बढेको नेताहरुले बताएका छन् । राष्ट्रपतिले सहमतिको सरकार गठनका लागि दिएको एक साताको समय आजै सकिने भएकोले साझ ५ बजे सम्म सहमति जुटेको वा नजुेको बारेमा राष्ट्रपतिलाई औपचारिक जानकारी गराउनुपर्ने हुन्छ । आजको छलफलबाट कस्तो सरकार बन्ने हो भन्ने स्पष्ट हुने बताउदै काङग्रेस नेता अर्जुन नरसिंह केसीले सहमति जुट्न नसके भोली देखि काङग्रेसकै नेतृत्वमा बहुमतिय सरकार गठनको प्रक्रिया थालिन जानकारी दिनुभयो ।