दलको नेता बन्न खनाल ओलीबीच कडा प्रतिस्पर्धा

माघ २१ काठमाण्डौ। संसदीय दलको नेता चयनका विषयमा सहमति जुट्न नसके पछि एमालेमा मतदानबाटै टुङ्गो लाग्ने देखिएको छ । हिजो केन्द्रीय समितिले दिएको समय अनुसार रातभरीमा पनि नेताहरुले सहमति जुटाउन नसकेपछि मतदानको सम्भावना बढेको छ । केन्द्रीय समितिको बैठक बिहान ११ बजे फेरि बस्दैछ । बिहान बस्ने केन्द्रीय समिति बैठकमा दुइटै पक्षले आफ्ना कुरा राखेपछि थप छलफल हुनेछ । स्रोतका अनुसार केन्द्रीय समितिमा पनि दलको नेता छान्न मतदान हुने तयारी भएको छ । केन्द्रीय समितिको बहुमतका आधारमा निर्णय गर्ने वा दलमै चुनाव गर्ने भन्नेमा पनि छलफल चलिहेको छ । आजको केन्द्रीय समितिमा पनि सहमति नजुटे दिउँसो २ बजेपछि संसदीय दलमा मतदान हुने छ । संसदीय दलको नेता चयनसँगै महाधिवेशनका लागि एमालेमा नेता केपी ओली र वामदेव गौतम मिलेपछि एमालेमा नयाँ समिकरण बनेको छ । दलको नेतामा अध्यक्ष झलनाथ खनाल र नेता ओली प्रतिस्पर्धामा रहनु भएको छ । अध्यक्ष र बरिष्ठ नेता माधवकुमार नेपाल एक ठाउँमा उभिनु भएको छ । एमालेमा खनालपक्ष यसअघिको परम्परा अनुसार अध्यक्ष नै दलको नेता बनाउनुपर्ने अडानमा छ भने ओली पक्षले एक व्यक्ति एक पदको अबधारणा अनुसार चयन हुनुपर्ने बताइरहेको छ ।