एकीकृत माओवादीको केन्द्रीय समितिको बैठक आज बस्दै

माघ १७ काठमाण्डौ ।एकीकृत नेकपा माओवादी केन्द्रीय समितिको बैठक आज बस्ने भएको छ । माघ २ गते शुरु भएर झण्डै दुई साता स्थगित भएका बीचमा पटक पटक स्थगित हुँदै आएको बैठक आज बस्न लागेको हो । आजको बैठकमा अध्यक्ष प्रचण्डको प्रतिवेदनमा केहीबेर छलफल गरेर आजै प्रतिवेदन पारित गरिने प्रवक्ता अग्निप्रसाद सापकोटाले जानकारी दिनुभयो । त्यस्तै नेताहरुको कार्यविभाजन पनि गरिने भएको छ । यस्तै आजैको बैठकले संसदीय दलको नेता चयनको विषय पनि टुंग्याउन सक्ने उहाँले बताउनुभयो । लामो विवादपछि संसदीय दलको नेतामा एकीकृत माओवादीले अध्यक्ष पुष्पकमल दाहाल प्रचण्डलाई चयन गर्ने लगभग निश्चित गरिसकेको छ । बैठक पार्टी कार्यालय कोटेश्वरमा दिउँसो १ बजे बस्नेछ ।